அந்தரங்க அடையாளம்

கடவுச்சொல்லை களவாட நடக்கும் 
முயற்சியின் எச்சரிக்கை சமிக்ஞை 
ஒளிர்ந்து கொண்டே இருக்கிறது

இவ்வளவு பதற்றத்துடன்
இத்தனை வரிசைவகுதி சேர்மானங்களில்
என் கதவுக்கு கள்ளச்சாவி முயற்சிக்கும்
பெயரிலியின் முகம் காண ஆசை

ப்ராக்ஸிகளின் தோலுறித்துக் காட்டும் 
தளங்களுக்கான பயனர் கணக்கு
என்னிடம் ஏற்கனவே இருக்கிறது

அடுத்தவர் அந்தரங்கத்தை 
எட்டிப்பார்க்கும் கிளர்ச்சியும்
பெயரிலியின் முகமூடியை 
உருவிப்பார்க்கும் கிளர்ச்சியும் 
இணை மாற்றாகுமா தெரியவில்லை

******