தொலைந்து நிற்கிறேன் !

பால்சங்கும் ,"ஐடக்ஸ்" கண்மையும்

அப்படியேதான் இருக்கின்றன ‍நான் தான்

நடக்கப் பழகி தொலைந்து போனேன் !

அம்மா கை பருப்பு சாதமும்,

"ஹார்லிக்ஸ்" பாட்டிலும் ,

அப்படியே தான் இருக்கின்றன ‍ நான் தான்

ஐந்தாம் வகுப்பு முடிந்து போய் தொலைந்து போனேன்!

பல்லாங்குழியும், பக்கத்து வீட்டு அக்கா ஸ்பரிசமும்

அப்படியே தான் இருக்கின்றன -நான் தான்

அரும்பிய மீசையில் தொலைந்து போனேன்!

ஊர்த்திருவிழாவும்,கூட்டாஞ்சோறும்

அப்படியே தான் இருகின்றன -நான் தான்

விடுதியில் விழுந்து தொலைந்து போனேன்!

பிடித்த பாடமும், வகுப்பறை வாசமும்

அப்படியே தான் இருகின்றன - நான் தான்

பச்சை சுடிதாரின் ஒற்றை சிரிப்பில் தொலைந்து போனேன்!

முதல் கவிதை தொகுப்பும்,முடித்த பட்டமும்

அப்படியே தான் இருகின்றன -நான் தான்

மூளை விற்று வாங்கிய வேலையில் தொலைந்து போனேன்!

என் வாழ்கையும்,

கொஞ்சம் போராட்டமும்,

நிறைய கற்பனையும்!

என் சிறகுகளும்,

கொஞ்சம் ஆசையும்,

நிறைய வானமும்!

என் தேவதைகளும்,

கொஞ்சம் வரமும்,

நிறைய ஆசிர்வாதமும்!

அப்படியே ,அப்படியே தான் இருகின்றன -நான் தான்

சராசரியாய் மாறி முழுதாய் ...முழுதாய் தொலைந்து நிற்கிறேன்!!!!

(20/09/2004 அன்று எழுதியது)