ரஜினியை மிஞ்சிவிட்டார் விஜயகாந்த் (வீடியோ ) !

ரஜினிகாந்த் - மேஜிக்

விஜயகாந்த் - மேஜிக்

என்ன தான் இருந்தாலும், பேரரசு அளவிற்கு சுந்தர்.சி. க்கு கிரியேட்டிவிட்டி கிடையாது. 

( வீடியோ படம் போட்டாத்தான் ஹிட்ஸ் கூடுமாமே, அப்படியா ??? )

வேணாம், கிட்ட வராதீங்க !

இவ்வளவு சொன்ன பிறகும், இந்த பக்கம் வந்திருககீங்கன்னா....... இப்போ கூட ஒன்னும் கெட்டுப் போகல, நேரா கீழே உள்ள " யாராண்ணே இருக்கும் ? " இதை மட்டும் படிச்சுட்டு கிளம்புங்க...

இன்னும் இங்க தான் இருக்கீங்களா, சரி படிங்க, விதி யாரை விட்டது ?

அடரிருள் தேகத்துக்குள் வந்த அக்னி தேவதை !

நினைவுகள் அழிந்த

நடுநிசி நித்திரையில்

ஆதியந்தமேதுமற்ற 

அடரிருள் பிரபஞ்சத்தின்

ஏகாந்த படிமம் தாங்கி

கவிழ்ந்த கனபரிமானத்தில்,

கடிவாளமற்ற புரவியேறி

சூன்யப்பெருவெளியை

சுமக்கின்ற கரும்பள்ளத்தின்

சுழி தாண்டிய பிரதேசத்தின்

புதையல் நோக்கிப் பறக்கின்றேன் !

சுழல்கின்ற சுழியினுள்

உயிர்பெற்ற ஒளிப்புள்ளி

கற்றையென தெறித்து வந்து

எரிதழலாய் வளர்கிறது,

சுழற்சி விதிகள் மாறும் போது

ஜ்வாலையாய் எழுந்து நின்று

விஸ்வரூபம் எடுக்கிறது !

கொழுந்துவிட்டு எரியும் மேனி

முழுவதுமாய் பிரபஞ்ச நெருப்பு,

ஒளிபிம்பத்தின் நிறைந்த கீற்றாய்

வழிநடத்தும் பெருவிழிகள்,

சுடர்மிகு விழிவழியே 

சிரிக்கின்றாள் எனைப்பார்த்து !

புரவி, புதையல் எல்லாம் துறந்து

என் ஆதியந்தம் எல்லாம் மறந்து

சேர்ந்து நானும் எரிகின்றேன்,

தழலோடு தழல் சேர்ந்த

தனித்துவத்தை உணர்கின்றேன் !

சரி, இவ்வளவு தூரம் பொறுமையா படிச்சிருக்கீங்க, நான் என்ன சொல்ல வர்றேன்னு தெரியாமலே போகலாமா ? இதையும் படிச்சுட்டு ஒரு நல்ல பதிலா சொல்லிட்டுப் போங்க !!

யாராண்ணே இருக்கும் ?

நேத்து பொழுதுசாய 

படுத்தது தான் தெரிஞ்சது,

அடிச்சுப் போட்டாப்ல 

அப்படியொரு உறக்கம்ண்ணே !

நட்டநடு ராத்திரில

குப்பறக்க படுத்திருந்தப்ப,

கண்ணக் கட்டி காட்டுல விட்ட மாதிரி

திக்குத் தெரியாத திசையில,

தூரதேசமா போயிட்டிருக்காப்ல,

அப்படியொரு கனவுண்ணே !

அப்போ, இம்மினிக்கானா 

புள்ளி மாதிரி ஆரம்பிச்சு

தீயாட்டம் தகதகன்னு

சுத்தி நின்னு எரியுது !

கொஞ்சம் சுதாரிச்சுப் பார்த்தா...

மோகினியோ, பிசாசோ ஏதோ ஒன்னு

மானத்துக்கும் பூமிக்குமா 

நெருப்பாட்டம் ஜொலிக்குது,

நான் அப்படியே 

வாய் பொழந்து நிக்கிறேண்ணே !

என் கிட்டக்க தாண்ணே,

நிக்கிறாப்புல நிக்குது,

ஆனா கண் கூசுறாப்புல மின்னுதுண்ணே !

அப்படியே லேசா சிரிச்சுக்கிட்டே

என்னை ஒரு பார்வை பார்த்துச்சு பாரேன்,

எனக்கு என்னமோ போல ஆயிருச்சுண்ணே !

ஆடு, குட்டி, காடு, கழனி 

அல்லாத்தையும் விட்டுப்புட்டு 

அது கூடவே செத்துப் போயிரலாம்னு 

தோனுச்சுன்னா பார்த்துக்கோயேன் !